Azərbaycan Respublikası Qaçqınların və Məcburi Köçkünlərin dəstəyi ilə “Gələcək indi” konsept ideyası ilə Təhsil Menecmenti Zirvəsi təşkil edilib. Dövlət qurumlarının nümayəndələrinin, qabaqcıl təhsil müəssisələrinin rəhbərlərinin, elmi işçilərin, ictimai fəalların iştirakı ilə keçrilən tədbir üç paneldən ibarət olub. Panel müzakirələrində gənc nəslin təhsili, düzgün peşə və ixtisas seçimi, bu sahədə beynəlxalq təcrübə, praktik zəkaların formalaşdırılması və təkmilləşdirilməsi istiqamətində dövlət və qeyri-dövlət sektorlarının əməkdaşlığı məsələlərinə diqqət yetirilib, dünya ölkələri təhsil sistemində istifadə edilən yeni metodologiya və terminlər təhlil edilib.
Dövlət Komitəsinin sədr müavini Fuad Hüseynov tədbirin açılışında bildirib ki, işğaldan azad olunmuş ərazilərə Böyük Qayıdış – dayanıqlı məskunlaşma və iqtisadi fəaliyyətə reinteqrasiya Azərbaycanın 2030-cu ilə kimi icra edilməli olan sosial-iqtisadi inkişafının beş milli prioritetindən biridir. Məhz bu əsada Böyük Qayıdışa dair I Dövlət Proqramı qəbul olunub və icra edilir. Prezident İlham Əliyev işğaldan azad edilmiş ərazilərdə bərpa-quruculuq işlərinin aparılmasını şəxsən nəzarətdə saxlayır, Birinci vitse-prezident Mehriban xanım Əliyeva ilə birlikdə həmin ərazilərdə mütəmadi səfər edir, müəyyənləşdirilmiş tədbirlərin icra vəziyyəti ilə yerində tanış olur.
Qeyd olunub ki, Böyük Qayıdışa dair I Dövlət Proqramının Tədbirlər Planında yenidən qurulan Qarabağ və Şərqi Zəngəzurda təhsil müəssisələrinin yaradılması da əsas vəzifələrdən biri kimi müəyyən edilib. Ərazilərimizin işğal altında saxlanıldığı dövrdə 1000-dən artıq təhsil müəssisəsinin dağıdıldığı vurğulanıb. Prezident İham Əliyevin tapşırıqlarına müvafiq olaraq bərpa-quruculuq işləri təhsil müssisələrini də əhatə edir, bərpası aparılan hər bir rayonda yeni məktəblər inşa olunur. “Gələcək indi” konsept mesajı ilə keçirilən Təhsil Menecmenti Zirvəsinin işğaldan azad edilmiş ərazilərdə həyata keçirilən işlərə də töhfəsini verəcəyinə əminlik ifadə olunub.
ADA Universitetinin dosenti və “Qarabağa Dönüş” təşkilatının sədr müavini Gülməmməd Məmmədov çıxışı zamanı ölkədə ilk dəfə keçirilən Təhsil Menecmenti zirvəsinin vacibliyindən danışıb. “İqtisadiyyat və sənayedən gələn ehtiyaclar təhsilin əsas hədəf və meyarlarını müəyyən edir,” - deyən G.Məmmədov bu yöndə işğaldan azad edilmiş ərazilərdə təhsil infrastruktunun yenidən qurulduğuna diqqət çəkib. Bildirib ki, təhsil sistemində qabaqcıl metodları olan ölkələrin metodologiyalarının Azərbaycanda tətbiq edilməsi vacibdir. Qeyd edilib ki, məktəbəqədər təhsil müəssisələrindən ali təhsil müəssisələrinədək bu yeniliklərdən istifadə edən kifayət qədər tədris ocaqları fəaliyyət göstərir və bu kimi qurumların sayı günün tələblərinə müvafiq olaraq hər keçən gün artmaqdadır.
Tədbir auditoriyanın suallarının cavablandırılması ilə davam edib.
Zirvə musiqili-əyləncə hissəsi ilə davam edib.
Qeyd edək ki, 200-dən çox şəxsin qatıldığı tədbirin hər üç paneli qonaqlar tərəfindən böyük maraqla qarşılanıb.
