Qaçqınların və Məcburi Köçkünlərin İşləri üzrə Dövlət Komitəsi Səhiyyə Nazirliyi, “Tibbi Ərazi Bölmələrini İdarəetmə Birliyi” (TƏBİB), İctimai Səhiyyə və İslahatlar Mərkəzi (İSİM), “Sağlam Ailə” Tibb Mərkəzi və “Facemark” şirkəti birgə ilk dəfə Səhiyyə Menecmenti Zirvəsi təşkil edib. Tədbirdə mərkəzi icra hakimiyyəti orqanlarının, dövlət və özəl tibb müəssisələrinin nümayəndələri iştirak ediblər.
Səhiyyə Menecmenti Zirvəsində panel müzakirələrdən biri Böyük Qayıdışa həsr olunub. Paneldə məcburi köçkünlərin müvəqqəti məskunlaşma yerlərində və işğaldan azad olmuş ərazilərdə sağlamlığının qorunması və səhiyyə xidmətləri ilə təmin olunması istiqamətində həyata keçirilən tədbirlər haqqında aidiyyəti dövlət qurumlarının, bir sıra beynəlxalq təşkilatların iştirakı ilə müzakirə aparılıb.
Qaçqınların və Məcburi Köçkünlərin İşləri üzrə Dövlət Komitəsi sədrinin müavini Fuad Hüseynov giriş nitqində qeyd edib ki, qaçqınların və məcburi köçkünlərin sağlamlığının qorunması, səhiyyə xidmətlərinə tələbatının təmin edilməsi ölkə rəhbərliyinin daim diqqət mərkəzində olmuşdur. Cənab Prezident İlham Əliyevin sosial siyasətində bu məsələlər prioritet istiqamət olmaqla yanaşı, Birinci vitse-prezident Mehriban xanım Əliyeva da qaçqınların və məcburi köçkünlərə hərtərəfli və keyfiyyətli səhiyyə xidmətləri ilə əhatə edilməsini xüsusilə nəzarətdə saxlayır.
Məcburi köçkünlərin sağlamlığının qorunması məqsədilə tibbi aksiyaların təşkili Dövlət Komitəsinin son beş ildə mühüm fəaliyyət istiqamətlərindən biri olub. Komitənin müraciəti əsasında Səhiyyə Nazirliyi belə aksiyalarda geniş tərkibli həkim briqadaların iştirakını, xəstəxanalarda və müvəqqəti məskunlaşma yerlərində səyyar tibbi müayinələrin keçirilməsini təmin edib. Aksiyalardan minlərlə məcburi köçkün faydalanıb. Bundan başqa, Dövlət Komitəsinin təşəbbüsü və təşkilatçılığı ilə Müdafiə Nazirliyi və Azərbaycan Qızıl Aypara Cəmiyyəti (AzQAC), Beynəlxalq Qızıl Xaç Komitəsinin (BQXK) dəstəyi ilə məcburi köçkünlər üçün 5 ilk tibbi yardım təlimləri keçirilib. Təlim proqramına ilk yardım və onun əsas prinsipləri, ilkin test, şəxsi təhlükəsizlik və hadisə yerinin qiymətləndirilməsi, zərərçəkmişin müayinəsi və bərpası, yanıqlar zamanı ilk yardım üzrə praktiki vərdişlərin nümayişi daxil olub. Dövlət Komitəsinin dəstəyi ilə Yaponiyanın “Fuji Optical Co. Ltd” şirkəti 2005-ci ildən etibarən hər il Azərbaycanda göz müayinəsi və eynək paylanışı aksiyasını həyata keçirib.
Bildirilib ki, işğaldan azad edilmiş ərazilərə Böyük Qayıdışa dair I Dövlət Proqramının Tədbirlər Planına əsasən, yaşayış məntəqələrində əlçatan və keyfiyyətli tibb xidmətləri infrastrukturunun qurulması üçün bir sıra mühüm vəzifələr müəyyən edilib. Tədbirlər Planında geri qayıdan şəxslərin psixo-sosial reabilitasiyası, o cümlədən köçürüləcək şəxslərin əvvəlcədən tibbi yoxlanışdan keçirilməsi üzrə əsas icraçı Səhiyyə Nazirliyi, Dövlət Komitəsi isə digər icraçı qurumlardan biri kimi müəyyən edilib. Bundan başqa, Dövlət Komitəsi və TƏBİB arasında qarşılıqlı əməkdaşlıq haqqında memorandum imzalanıb. Memorandum işğaldan azad olunmuş ərazilərə qayıdışla bağlı məcburi köçkünlərlə iş sahəsində qarşılıqlı faydalı, uzunmüddətli, effektiv əlaqələrin qurulması və inkişafı üçün əməkdaşlıq çərçivəsini, koordinasiya prosedurlarını müəyyən edir. Hazırda işğaldan azad edilmiş ərazilərə qayıdan şəxslərin TƏBİB tərəfindən ümumi tibbi müayinəsi təşkil edilir, həmçinin uşaqların təsdiqlənmiş Peyvənd Təqviminə əsasən, müxtəlif yoluxucu xəstəliklər əleyhinə immunizasiyası aparılır.
Səhiyyə Menecmenti Zirvəsində Laçın Rayon Mərkəzi Xəstəxanasının direktoru Orxan Cəbrayıl "Böyük Qayıdışa dair I Dövlət Proqramı" əsasında işğaldan azad edilmiş ərazilərdə indiyə qədər səhiyyə quruculuğu istiqamətində görülən işlər və gələcəkdə həyata keçiriləcək layihələr barədə çıxış edib.
