Azərbaycan Respublikası Qaçqınların və Məcburi Köçkünlərin İşləri üzrə Dövlət Komitəsi tərəfindən hazırlanan “Bura mənim evimdir” sənədli film Türkiyənin İzmir şəhərində keçirilən "Qızıl alma" Beynəlxalq Turan Film Festivalında nümayiş etdirilib. 

Film Amerikada doğulub boya-başa çatmış Ceyhun Qarabağlı adlı gəncin baba yurduna - Cəbrayıl rayonunun Süleymanlı kəndinə səfərindən və oradakı yaşantılarından bəhs edir. Bildirilib ki, Ceyhun Qarabağlının səfər təəssüratını filmə çevirmək və bir vətənpərvərlik hekayəsi kimi həm öz cəmiyyətimizə, həm dünya ictimaiyyətinə təqdim etmək ideyası onun Azərbaycana, irsən bağlı olduğu, amma indiyədək görmədiyi doğma kəndinə munis münasibətindən qaynaqlanıb. Bu münasibət bizim bir millət, xalq kimi ən mühüm özəlliyimizdir. Ceyhun və onun həmyaşıdları Qarabağın, Şərqi Zəngəzurun, ümumilikdə Azərbaycanın gələcəyi üçün çalışmağa, xalqımızın və dövlətimizin inkişafına xidmət göstərməyə daim hazırdırlar və bu, xalqımızın azadlıq mübarizəsinin, milli dirçəlişimizin nailiyyətidir. 

Türkiyənin Mədəniyyət və Turizm Nazirliyi, Film Baş İdarəsi və Dövlət Arxivləri Baş İdarəsinin dəstəyi ilə Beynəlxalq Türk Mədəniyyəti Təşkilatı (TÜRKSOY) və Ege Universiteti tərəfindən ilk dəfə təşkil olunan festivalda dövlət rəsmiləri, Türkiyə Prezidentinin baş müşavirləri, Türkiyə Dövlət Arxivləri başqanı, Milli Saraylar Başqanlığının müdiri, Türkiyə Mədəniyyət və Turizm Nazirliyinin Kino idarəsinin rəisi Birol Geven və başqa yüksək vəzifəli şəxslər və Dövlət Komitəsinin rəsmi nümayəndələri iştirak ediblər.