Böyük Qayıdışa dair I Dövlət Proqramı çərçivəsində Qaçqınların və Məcburi Köçkünlərin İşləri üzrə Dövlət Komitəsinin əməkdaşları üçün “Qayıdış prosesində müvafiq profillərə uyğun əhali qrupları üzrə məlumatlandırma” mövzusunda təlim keçirilib. Təlim qayıdış prosesində əhali qruplarının xüsusiyyətlərinə uyğun məlumatlandırma işinin aparılması, effektiv təbliğat və təşviqat tədbirlərinin təşkili üzrə bilik və təcrübələrin artırılmasına, habelə qayıdış və reinteqrasiya prosesinin hərtərəfli və insana yönəlik şəkildə həyata keçirilməsinə həsr olunub. Təlimin keçirilməsində əsas məqsəd Dövlət Komitəsinin əməkdaşlarının müvafiq sahələr üzrə bilik və bacarıqlarının artırılması, peşəkar vərdişlərinin təkmilləşdirilməsidir. Qeyd edək ki, silsilə şəklində cari ilin sonunadək keçirilməsi planlaşdırılan bu təlimlər “Böyük Qayıdışa dair I Dövlət Proqramı”nın Tədbirlər Planının “Əhalinin geri qayıdışı və ərazilərdə dayanıqlı icmaların yaradılması” üzrə 3-cü prioritet istiqaməti çərçivəsində həyata keçirilir. Təlimlər geri qayıdan əhaliyə dəstək məqsədilə xüsusi qaynar xəttin yaradılması, habelə onların adaptasiyası ilə bağlı tədbirlərin daha səmərəli icrası üçün müvafiq dövlət orqanları əməkdaşlarının peşəkar təlimlərə cəlb olunmasını nəzərdə tutan 3.1.5-ci fəaliyyət istiqaməti üzrə təşkil olunur.
