Məcburi köçkünlərin sosial problemlərinin həlli, rifah halının yüksəldilməsi hər zaman Prezident İlham Əliyevin diqqət mərkəzindədir. Birinci vitse-prezident Mehriban xanım Əliyevanın bu kateqoriyadan olan həmvətənlərimizə həssas münasibəti onlarda dərin minnətdarlıq hissi doğurur.
Aztəminatlı məcburi köçkün ailələrdən olan şagirdlərin qış üst geyimi ilə təmin edilməsini Qaçqınların və Məcburi Köçkünlərin İşləri üzrə Dövlət Komitəsi daim diqqətdə saxlayır. Belə ki, respublikamızın müxtəlif regionlarında, rayon mərkəzlərindən kənarda yerləşən kəndlərdə yaşayan aztəminatlı məcburi köçkün ailələrdən olan məktəbliləri üçün bu il də müəyyən yaş qrupları üzrə gödəkçələr göndərilib, eləcə də komitəyə fərdi qaydada ərizə ilə müraciət edən məcburi köçkün övladlarına geyimlərin verilməsi təmin edilib.
Geyimlər Bakı şəhərində və respublikamızın müxtəlif regionlarında yerləşən, əsasən, məcburi köçkünlərin çalışdıqları tikiş-toxuculuq sexlərində istehsal olunub.
Komitə sədrinin müvafiq əmri əsasında, 2024-2025-ci tədris ili üçün Ağdam rayonuna 2000 ədəd, Xocavənd rayonuna 500 ədəd, Şuşa rayonuna 500 ədəd, Kəlbəcər rayonuna 500 ədəd, Füzuli rayonuna 600 ədəd, Cəbrayıl rayonuna 600 ədəd, Qubadlı rayonuna 500 ədəd, Zəngilan rayonuna 250 ədəd, Xocalı rayonuna 600 ədəd, Ağcabədi rayonuna 600 ədəd, Dövlət Komitəsinin Bərdə rayonunda yerləşən nümayəndəliyinə 600 ədəd, Gəncə şəhəri, Samux, Göygöl, Daşkəsən rayonlarında yerləşən nümayəndəliyinə 1500 ədəd, Qax, Zaqatala, Balakən rayonlarında yerləşən nümayəndəliyinə 600 ədəd, fərdi qaydada müraciət edən məcburi köçkünlərə 28 ədəd gödəkçə təqdim edilib. Geyimlər aztəminatlı məcburi köçkün ailələrin övladlarına humanitar yardım olaraq pulsuz verilir.
Bundan öncə, yeni tədris ilinin başlanması ilə əlaqədar olaraq, Dövlət Komitəsi tərəfindən aztəminatlı məcburi köçkün ailələrin övladlarına 7375 dəst məktəbli geyim forması paylanılıb.
Tədbir Azərbaycan Respublikası Prezidentinin 2020-ci il 27 noyabr tarixli Sərəncamı ilə təsdiq edilmiş “Uşaqlara dair Strategiyanın həyata keçirilməsi üzrə 2020-2025-ci illər üçün Fəaliyyət Planı”nın 5.3.16-cı bəndinə uyğun olaraq, erməni təcavüzü nəticəsində əziyyət çəkən ailələrin uşaqlarına sosial dəstək göstərilməsi istiqamətində həyata keçirilib.
