İndoneziyanın İnsan Hüquqları üzrə Milli Komissiyasının sədri məcburi köçkünlərin həyat şəraiti ilə tanış olub

XƏBƏRLƏR

Çap et 1803

Mətbuat xidmətinin məlumatı 24 Oktyabr, 2015

Azərbaycanda səfərdə olan İndoneziya Respublikasının İnsan Hüquqları üzrə Milli Komissiyasının sədri Nur Xolisin başçılıq etdiyi nümayəndə heyəti oktyabrın 23-də Abşeron rayonunun Masazır qəsəbəsi ərazisində Dövlət Neft Fondunun vəsaiti hesabına məcburi köçkünlər üçün salınmış məhəllədə olub. Məcburi köçkünlər üçün yaradılan şəraitlə yerində tanış olmaq məqsədilə buraya gələn nümayəndə heyətini ərazidə Qaçqınların və Məcburi Köçkünlərin İşləri üzrə Dövlət Komitəsi sədrinin müavinləri Gəray Fərhadov və Fuad Hüseynov, Abşeron və Zəngilan rayon icra hakimiyyətlərinin başçıları İradə Gülməmmədova və Ramiz Həsənov qarşılayıblar. Azərbaycanın qaçqın və məcburi köçkünlərinin problemi ilə yaxından maraqlandığına görə indoneziyalı qonaqlara təşəkkürünü bildirən Gəray Fərhadov bildirib ki, Bakıda və Bakıətrafı ərazilərdə, respublikamızın müxtəlif bölgələrində qaçqın və məcburi köçkünlər üçün bütün sosial-texniki infrastrukturları ilə birlikdə müasir qəsəbə və məhəllələr salınıb, daha ağır şəraitdə yaşayan minlərlə qaçqın və məcburi köçkünün mənzil-məişət şəraiti yaxşılaşdırılıb. Hələ də məcburi köçkünlərin müəyyən qisminin yataqxanalarda, tikintisi yarımçıq qalmış obyektlərdə ağır şəraitdə yaşadığını xatırladan komitə sədrinin müavini deyib ki, dövlətimiz tərəfindən onların da mənzil-məişət şəraitlərinin yaxşılaşdırılması istiqamətində mərhələli şəkildə müvafiq tədbirlər həyata keçirilir. Bu məhəllədə 760 məcburi köçkün ailəsi müvəqqəti məskunlaşdırılıb. Torpaqlar azad edildikdən sonra onlar öz doğma yurdlarına qayıdacaqlar. Sonra qonaqlar ərazidəki 540 şagird yerlik 33 nömrəli Zəngilan rayon tam orta məktəbində yaradılan şəraitlə, həmin məktəbdə olan 125 saylı Zəngilan-Qubadlı seçki dairəsinin 2 saylı seçki məntəqəsinin iş prosesi ilə tanış olublar. Məktəblilərin ingilis dilində İndoneziya ilə bağlı verdikləri ətraflı məlumatlar nümayəndə heyətinin marağına səbəb olub. Qonaqlar, həmçinin məhəllədəki 280 yerlik uşaq bağçası, burada tərbiyə alan uşaqların əl işləri ilə tanış olub, körpələrin ifasında xalqlar arasında sülhü və dostluğu tərənnüm edən mahnıları dinləyiblər. İndoneziyalı qonaqlar məhəllədə məskunlaşan məcburi köçkünlərin həyat şəraiti ilə də tanış olublar. Zəngilandan məcburi köçkün Ərşad Priyevin mənzilində çay süfrəsi ətrafındakı söhbət əsnasında bildirilib ki, Azərbaycan dövləti bu gün məcburi köçkün həyatı yaşayan vətəndaşlarına hərtərəfli qayğı göstərir, onların problemlərinin həllini müntəzəm diqqət mərkəzində saxlayır. Lakin bütün bunlara baxmayaraq hər bir məcburi köçkün doğma ocaqlarına qayıtmaq arzusu ilə yaşayır. Sonra indoneziyalı qonaqlar Yasamal rayonu ərazisində Azərbaycan Texniki Universitetinin yataqxanalarında məskunlaşan məcburi köçkünlərlə görüşüb, onların həyat şəraiti ilə tanış olublar. Zəngilan rayonundan məcburi köçkün Alı Əliyevin mənzilində söhbət zamanı bildirilib ki, bu ərazidəki yataqxanalar kompleksində 1300-dən çox məcburi köçkün ailəsi məskunlaşıb. Görüşlərdə Nur Xolis Ermənistan-Azərbaycan, Dağlıq Qarabağ münaqişəsinin beynəlxalq hüququn prinsipləri əsasında həllinin, qaçqın və məcburi köçkünlərin öz doğma yurdlarına qayıtmalarının zəruriliyini bildirib.