Avropa Şurası Katibliyinin siyasi məsələlər üzrə direktoru Dövlətqaçqınkomda olub

XƏBƏRLƏR

Çap et 1196

Mətbuat xidmətinin məlumatı 10 Aprel, 2015

Qaçqınların və Məcburi Köçkünlərin İşləri üzrə Dövlət Komitəsi sədrinin müavini Fuad Hüseynov aprelin 9-da ölkəmizdə səfərdə olan Avropa Şurası Katibliyinin siyasi məsələlər üzrə direktoru Aleksandr Qesselin rəhbərlik etdiyi Avropa Şurası Nazirlər Komitəsinin Demokratiya üzrə məruzəçilər qrupunun nümayəndə heyəti ilə görüşmüşdür. Əsasən ölkəmizin bu təşkilat qarşısında öhdəliklərinin yerinə yetirilməsi vəziyyəti ilə bağlı məsələlərin müzaikrəsinə həsr olunmuş və bu barədə fikir mübadiləsi aparılmış görüşdə həmçinin qonaqlara Ermənistan-Azərbaycan, Dağlıq Qarabağ münaqişəsi, problemin tarixi və ölkəmizdəki qaçqın və məcburi köçkünlərin vəziyyəti haqqında ətraflı məlumat verilib. Bildirilib ki, azərbaycanlılar bir neçə dəfə öz əzəli yurdlarından zorla köçürülməyə, etnik təmizləmə və deportasiya siyasətinə məruz qalıblar. Komitə sədrinin müavini Ermənistan silahlı qüvvələrinin Azərbaycana hərbi təcavüzü nəticəsində torpaqlarımızın 20 faizinin - Dağlıq Qarabağ və ona bitişik 7 inzibati rayonun işğal olunduğunu, bir milyon iki yüz mindən artıq soydaşımızın qaçqın və məcburi köçkünə çevrildiyini, milli-mədəni sərvətlərimizin talan edildiyini, bütün infrastrukturun dağıdıldığını qonaqların diqqətinə çatdırıb. Qeyd olunub ki, BMT Təhlükəsizlik Şurası Azərbaycanın işğal olunmuş ərazilərinin azad edilməsi, qaçqınların və məcburi köçkünlərin doğma yurdlarına qaytarılması ilə bağlı dörd qətnamə qəbul edib. Ermənistanın təcavüzkar siyasəti ATƏT, AŞPA, İslam Əməkdaşlıq Təşkilatı və digər beynəlxalq təşkilatlar tərəfindən qəbul edilmiş qərar və qətnamələrdə də pislənilib. Təəssüf ki, bu qərar və qətnamələr hələ də kağız üzərində qalır. Beynəlxalq ictimaiyyətin tələblərinə məhəl qoymayan Ermənistan işğal edilmiş Azərbaycan ərazilərində qanunsuz fəaliyyətini davam etdirməkdədir. ATƏT-in Minsk qrupunun vasitəçiliyi ilə 20 ildən artıqdır davam edən danışıqlar prosesi hələ də heç bir nəticə verməyib. Bildirilib ki, bu münaqişə təkcə Cənubi Qafqaz regionu üçün deyil, bütün dünya üçün təhlükədir. Görüşdə, həmçinin diqqətə çatdırılıb ki, Azərbaycan hökuməti qaçqın və məcburi köçkünlərin ehtiyaclarını ödəmək üçün həm hüquqi, həm də sosial-iqtisadi sahədə böyük işlər görür. Dövlət Neft Fondundan ayrılan vəsait hesabına 90 müasir qəsəbə salınıb. 240 min qaçqın və məcburi köçkün yeni qəsəbələrə köçürülüb və bu proses davam edir. Azərbaycana səfəri barədə məlumat verən qonaq bildirib ki, Ermənistan-Azərbaycan, Dağlıq Qarabağ münaqişəsi və onun nəticələri, ölkəmizdəki qaçqın və məcburi köçkünlərlə bağlı məlumatı var. Lakin buna baxmayaraq bu səfəri çərçivəsində daha ətraflı məlumat aldığına görə minnətdarlığını bildirən qonaq həmçinin onu da diqqətə çatdırıb ki, bu münaqişə bütün region üçün ciddi problemdir. Sonda qonaqlara “Qaçqın və məcburi köçkünlərə Prezident qayğısı” kitabı və disk təqdim edilib. Onlar Dövlətqaçqınkomda yaradılmış Heydər Əliyev guşəsində ümummilli liderimizin qaçqın və məcburi köçkün soydaşlarımızla keçirdiyi görüşləri və digər tədbirləri özündə əks etdirən fotolarla, digər eksponatlarla tanış olmuşlar.