Çaloka Beyani: Ermənistan-Azərbaycan, Dağlıq Qarabağ münaqişəsinin həllinin vaxtı çoxdan çatmışdır

XƏBƏRLƏR

Çap et 1094

Mətbuat xidmətinin məlumatı 24 May, 2014

Azərbaycanda qaçqın və məcburi köçkünlərlə görüşlərim zamanı onların hamısı bir ağızdan doğma yurd-yuvalarına qayıtmaq arzularını dilə gətirdilər. Düşünürəm ki, Dağlıq Qarabağ münaqişəsinin həllinin vaxtı çoxdan gəlib çatmışdır. Bu, beynəlxalq ictimaiyyətdən də müəyyən səylər göstərilməsini tələb edir. Bu sözləri BMT-nin İnsan Hüquqları Şurasının məcburi köçkünlərin hüquqları üzrə xüsusi məruzəçisi Çaloka Beyani mayın 23-də Bakıda keçirdiyi mətbuat konfransında demişdir. Ç.Beyani səfəri zamanı qaçqın və məcburi köçkünlərin məskunlaşdıqları ərazilərə baş çəkdiyini, Azərbaycan hökumətinin məcburi köçkünlərin həyat şəraitinin yaxşılaşdırılması ilə bağlı gördüyü işlərin şahidi olduğunu vurğulamışdır. Səfər çərçivəsində dövlət və hökumət rəsmiləri, vətəndaş cəmiyyətinin nümayəndələri ilə görüşdüyünü diqqətə çatdıran BMT-nin xüsusi məruzəçisi demişdir: “Münaqişənin tarixi bəllidir. Səfərdən sonra BMT Təhlükəsizlik Şurasının üzvləri ilə qeyri-rəsmi görüş keçirəcəyəm və hazırladığım hesabatda bütün məsələlər öz əksini tapacaqdır. Əsas diqqət diplomatik dialoqa yönəlməlidir. Dünyada sülhə maraqlı olan təşkilatlar da regionda sabitliyə töhfə verməyə cəlb olunmalıdır. Azərbaycanda insanların səmimi münasibəti məndə xoş təəssüratlar yaratdı. İstərdim ki, bu insanların üzərində məcburi köçkünlük yükü qalmasın”. Qaçqın və məcburi köçkünlərin vəziyyətinin yaxşılaşdırılması ilə bağlı beynəlxalq sənədlərdə boşluqların olduğunu söyləyən Ç.Beyani fəaliyyəti müddətində bu çatışmazlıqların aradan qaldırılmasına çalışacağını vurğulamışdır. Mətbuat konfransında iştirak edən Azərbaycan Respublikası Baş nazirinin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov BMT-nin qaçqın və məcburi köçkünlərin hüquqları üzrə xüsusi məruzəçilərinin ölkəmizə dəfələrlə səfər etdiklərini, onların hazırladıqları hesabatların hələ heç bir nəticə vermədiyini söyləmişdir. Əli Həsənov gec-tez bu hesabatların, bəyanatların öz təsirini göstərəcəyini vurğulamışdır. Baş nazirin müavini bu günlərdə ATƏT-in Minsk qrupunun həmsədrlərinin Ermənistana səfəri zamanı ABŞ-dan olan həmsədrin Madrid prinsiplərinin tətbiq olunması ilə bağlı fikir bildirdikdə 200 nəfərdən ibarət insanın hücumuna məruz qaldığını və qarşılıqlı etimad məsələsinin hər zaman Ermənistan tərəfindən pozulduğunu diqqətə çatdırmışdır. Əli Həsənov demişdir: “Prezident İlham Əliyevin “Azərbaycan bir qarış da torpağını Ermənistana güzəştə getməyəcək” fikri Azərbaycan xalqının da birmənalı mövqeyidir. Ermənistan tərəfinin bunu tez başa düşməsi və konstruktiv mövqeyə gəlməsi onun xeyrinədir. Hələ ki, uduzan yalnız onlardır. Biz istəyirik ki, hər bir beynəlxalq təşkilat münaqişənin həll olunmasına obyektiv, ədalətli yanaşsın. BMT-dən isə istəyimiz və tələbimiz odur ki, qəbul etdiyi qətnamələri icra etsin. ATƏT-in Minsk qrupunun həmsədrləri də bir məsələyə aydınlıq gətirsinlər: Nə üçün onlar Ermənistanda qaçqınlarla görüşür, onların həyat şəraiti ilə tanış olurlar, amma Azərbaycanda bunu etmirlər?”. Əli Həsənov BMT-nin xüsusi məruzəçisi Çaloka Beyaninin regiona səfəri ilə bağlı hesabatında hər bir reallığın doğru əks olunacağına ümid etdiyini bildirmişdir.