Qobu məcburi köçkün yaşayış massivinin layihələndirilməsi ilə bağlı müşavirə keçirilmişdir

XƏBƏRLƏR

Çap et 1261

Mətbuat xidmətinin məlumatı 20 Aprel, 2013

Aprelin 19-da Abşeron rayonu, Qobu bələdiyyəsinin ərazisindən ayrılmış 500 hektar torpaq sahəsində salınacaq Qobu məcburi köçkün yaşayış massivinin layihələndirilməsi ilə bağlı müşavirə keçirilmişdir. Baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri cənab Əli Həsənov son illər ölkəmizdə qaçqınların və məcburi köçkünlərin sosial, mənzil-məişət şəraitinin yaxşılaşdırılması istiqamətində görülən işlərdən danışmışdır. Bildirilmişdir ki, hazırda Bakı və Sumqayıt şəhərlərinin, Abşeron yarımadasının ərazisində ümumilikdə 300 mindən çox məcburi köçkün yaşayır. Bu ərazilərdə müvəqqəti məskunlaşan bütün məcburi köçkünlər yaxın iki-dörd il ərzində Abşeron rayonunda, Qobu bələdiyyəsinin ərazisindən ayrılmış yeni böyük yaşayış massivinə köçürüləcəkdir. Tikiləcək yeni yaşayış massivi müasir standartlara cavab verəcək, istilik, elektrik, su təminatı ilə tam təchiz olunacaqdır. Hazırda 2200 ailənin Müşfiqabad və Masazırda tikilən yeni yaşayış massivlərinə köçürülməsi prosesinin davam etdiyini deyən Əli Həsənov bildirmişdir ki, hazırda Gəncədə 500 yerlik müasir tələblərə cavab verən mədəniyyət sarayı da tikilir. Cari ildə respublikanın yeddi-səkkiz rayonunda yeni qəsəbələrin tikintisi də davam etdiriləcəkdir. Azərbaycan Respublikasının Prezidenti cənab İlham Əliyevin qaçqınlara və məcburi köçkünlərə daim diqqət və qayğı göstərdiyini vurğulayan Əli Həsənov bildirmişdir ki, dövlətimizin başçısı son üç ayda üç yeni müasir qəsəbənin açılışında iştirak etmişdir. İnşa olunan bütün qəsəbələr yüksək keyfiyyətlə tikilmişdir. Layihə barədə məlumat verən “Azərinşaatlayihə” Layihə-Konstruktor və Texnoloji İnstitutunun direktoru Yusif Nağıyev demişdir ki, ərazidə 1200 şagird yerlik on məktəb, on uşaq bağçası, uşaq-gənclər, səhiyyə, ictimai iaşə obyektləri, mədəniyyət və bədən tərbiyəsi müəssisələri yaradılacaqdır. Ümumilikdə 204 yaşayış binası inşa ediləcək yaşayış massivində hər birində 9 min nəfər olmaqla on belə mikrorayonun salınması nəzərdə tutulmuşdur. Qobu yaşayış massivinin ərazisində geoloji kəşfiyyat işlərinin də aparıldığını diqqətə çatdıran Y.Nağıyev burada 3 min 250 kəşfiyyat quyusunun qazıldığını və ərazinin yaşayış üçün yararlı olduğunu bildirmişdir. Layihə ilə bağlı aidiyyəti qurumların nümayəndələri tədbirdə çıxış edərək rəy və təkliflərini bildirmişlər. Qeyd etmişlər ki, müasir standartlara cavab verəcək bu yaşayış massivinin inşası Azərbaycan Respublikasının Prezidenti cənab İlham Əliyevin qaçqınlara və məcburi köçkünlərə diqqət və qayğısının bariz nümunəsidir.