Qaçqınların və Məcburi Köçkünlərin İşləri üzrə Dövlət Komitəsi “Qarabağa qayıdan qadınlar: qədim yurdda yeni perspektivlər” adlı tədbir keçirib. Müxtəlif peşələri təmsil edən keçmiş məcburi köçkün qadınların da iştirak etdiyi tədbirdə işğaldan azad edilmiş ərazilərə Böyük Qayıdış məsələsi ətraflı müzakirə olunub, fikir mübadiləsi aparılıb.
Qeyd edilib ki, Prezident İlham Əliyevin tapşırıqları və işğaldan azad edilmiş ərazilərə Böyük Qayıdışa dair I Dövlət Proqramında nəzərdə tutulan tədbirlər ardıcıllqıla icra olunur. Genişmiqyaslı bərpa-quruculuq işləri aparılır, qədim yurd yerlərimiz yenidən abad, təhlükəsiz yaşayış məkanına çevrilir. Dövlətimizin başçısı ilə birlikdə Birinci vitse-prezident Mehriban xanım Əliyeva da Qarabağda və Şərqi Zəngəzurda olur, doğma yurda qayıdan həmvətənlərimizlə görüşlərdə iştirak edir, sosial sahədə həyata keçirilən işləri diqqətdə saxlayır.
Dövlət Komitəsinin əməkdaşı, Gender qrupunun rəhbəri Günel Piriyeva məşğulluqla bağlı tədbirlər planında qadınların roluna xüsusi diqqət yetirildiyini bildirib. Onun sözlərinə görə, bu addımların məqsədi qadınların iqtisadi fəaliyyətə cəlb edilməsi, onların sosial-iqtisadi fəaliyyətinin gücləndirilməsidir.
Laçın rayon sakini, hüquq elmləri üzrə fəlsəfə doktoru Aynur Musayeva, Şuşa şəhər sakini, Şuşa 1 nömrəli məktəbin direktoru Səbinə Gözəlova Böyük Qayıdışın başlanmasının, keçmiş məcburi köçkünlərin doğma yurdlarına qayıdışı prosesinin qürurverici hadisə olduğunu bildiriblər. Sakinlərin doğma yurdlarına könüllü, təhlükəsiz və ləyaqətlə qayıdışı zamanı təhsil, mədəniyyət, səhiyyə və digər sosial sahələrin inkişafı üçün də mühüm addım atıldığı, məşğulluğun təmin edilməsində qadınların ön sıralarda olduğu bildirilib. Diqqətə çatdırılıb ki, keçmiş məcburi köçkünlərin doğma yurdlarına reinteqrasiya prosesində qadınların rolu böyükdür.
Tədbirdə məcburi köçkünlərin yeni salınmış yaşayış məntəqələrinə könüllü və təhlükəsiz geri dönüşünü təşviq etmək məqsədilə Dövlət Komitəsi tərəfindən hazırlanmış müxtəlif təbliğat-izahat xarakterli videoçarxlar nümayiş etdirilib, məlumat kitabçası, broşürlər paylanıb.
