Mayın 6-da Gənclər və İdman Nazirliyi, AFFA və Azərbaycan Minifutbol Federasiyasının birgə təşkilatçılığı ilə Ulu Öndər Heydər Əliyevin xatirəsinə həsr olunmuş dövlət qurumları arasında III minifutbol turnirinə yekun vurulub. Qaçqınların və Məcburi Köçkünlərin İşləri üzrə Dövlət Komitəsi final oyununu Ədliyyə Nazirliyi ilə oynayıb. Gərgin mübarizə şəraitində keçən görüşdən Dövlət Komitəsi gümüş mükafatçı kimi ayrılıb. Turnirə mükafatlandırma mərasimi ilə yekun vurulub, komanda üzvlərinə müvafiq medallar və mükafatlar təqdim edilib. Komanda üzvü Məhəmməd Hacıyev “Ən yaxşı bombardir” nominasiyasında təltif edilib. Final oyununu canlı izləyən Qaçqınların və Məcburi Köçkünlərin İşləri üzrə Dövlət Komitəsinin sədri Rövşən Rzayev  turnirdə komitəni təmsil edən komanda üzvləri ilə görüşüb. Ölkəmizdə idmanın və bədən tərbiyəsinin inkişafına, gənc nəslin fiziki və mənəvi sağlamlığına dövlətimizin böyük qayğı göstərdiyi, bu qayğının məcburi köçkün gəncləri də əhatə etdiyi diqqətə çatdırılıb. Qeyd olunub ki, keçmiş köçkünlərin müvəqqəti məskunlaşdığı qəsəbələr kimi, işğaldan azad edilmiş ərazilərin yenidən qurulması zamanı da idman infrastrukturunun yaradılması, gənc nəslin fiziki və mənəvi sağlamlığının inkişafına diqqət ayrılır. Komanda üzvlərinə turnirdə fəal iştirakları və nümayiş etdirdikləri əzmkarlığa görə təşəkkür edilib, uğurlar arzulanıb. Sonda xatirə şəkli çəkdirilib.