Böyük Qayıdışa dair I Dövlət Proqramı çərçivəsində Qaçqınların və Məcburi Köçkünlərin İşləri üzrə Dövlət Komitəsinin əməkdaşları üçün "Qayıdış prosesində müvafiq profillərə uyğun əhali qrupları üzrə məlumatlandırma" mövzusunda təlim təşkil edilib. Təlimdə qrafik dizayn sahəsindəki son tendensiyalar və ən çox istifadə olunan proqramların xüsusiyyətləri ətrafında müzakirələr aparılıb. İştirakçılara dövlət qurumlarının fəaliyyətində vizual kommunikasiya və dizayn bacarıqlarını artırmaq, həmçinin əməkdaşların gündəlik işlərində qrafik dizayn proqramlarından effektiv istifadə etmələri üçün müxtəlif yanaşmalar öyrədilib. Təlimlərin keçirilməsində məqsəd komitə əməkdaşlarının müvafiq istiqamətlərdə bilik və bacarıqlarını təkmilləşdirmək, peşəkar vərdişləri inkişaf etdirməkdir. Sonda komitə əməkdaşlarının sualları cavablandırılıb, qarşılıqlı müzakirələr aparılıb. Xatirladaq ki, təlimdə 32 nəfərin iştirakı təmin edilib. Qeyd edək ki, silsilə şəklində cari ilin sonunadək icrası planlaşdırılan təlimlər Böyük Qayıdışa dair I Dövlət Proqramı”nın Tədbirlər Planının “Əhalinin geri qayıdışı və ərazilərdə dayanıqlı icmaların yaradılması”, 3-cü prioritet istiqaməti çərçivəsində "Geri qayıdan əhaliyə dəstək məqsədilə xüsusi qaynar xəttin yaradılması və onların adaptasiyası ilə bağlı tədbirlərin daha səmərəli həyata keçirilməsi üçün müvafiq dövlət orqanları əməkdaşlarının peşəkar təlimlərə cəlb olunması" (3.1.5.) fəaliyyət istiqaməti üzrə həyata keçirilir.