İşğaldan azad edilmiş ərazilərə Böyük Qayıdışa dair I Dövlət Proqramı çərçivəsində Qaçqınların və Məcburi Köçkünlərin İşləri üzrə Dövlət Komitəsinin əməkdaşları üçün “Qayıdış prosesində əhalinin adaptasiyası ilə bağlı beynəlxalq təcrübənin öyrənilməsi” mövzusunda təlim keçirilib. Təlim repatriyasiya prosesinin təşkilində fundamental biliklərin, təcrübələrin, alətlərin araşdırılması, köçürüləcək əhalinin iştirakçılığının təmin edilməsi istiqamətində beynəlxalq praktikaların yerli kontekstə uyğun tətbiq edilməsi üsulları ilə bağlı mövzulara həsr edilib. İştirakçılara həmçinin gələcəkdə bu bilikləri öz fəaliyyət sahələrində tətbiq etməyə dair tövsiyələr verilib. Tədbirin keçirilməsində əsas məqsəd komitə əməkdaşlarının bilik və bacarıqlarını təkmilləşdirməkdən, onların peşəkar vərdişlərini inkişaf etdirməkdən ibarət olub. Sonda iştirakçıların sualları cavablandırılıb və qarşılıqlı müzakirələr aparılıb. Xatirladaq ki, təlimdə 30 nəfər əməkdaşın iştirakı təmin edilib. Qeyd edək ki, silsilə şəklində cari ilin sonunadək icrası planlaşdırılan təlimlər Böyük Qayıdışa dair I Dövlət Proqramı”nın Tədbirlər Planının “Əhalinin geri qayıdışı və ərazilərdə dayanıqlı icmaların yaradılması”, 3-cü prioritet istiqaməti çərçivəsində "Geri qayıdan əhaliyə dəstək məqsədilə xüsusi qaynar xəttin yaradılması və onların adaptasiyası ilə bağlı tədbirlərin daha səmərəli həyata keçirilməsi üçün müvafiq dövlət orqanları əməkdaşlarının peşəkar təlimlərə cəlb olunması" (3.1.5.) fəaliyyət istiqaməti üzrə həyata keçirilir.