Qaçqınların və Məcburi Köçkünlərin İşləri üzrə Dövlət Komitəsinin struktur bölmələrinin rəhbərləri və müavinləri üçün dövlət qulluqçularının xidməti fəaliyyətinin qiymətləndirilməsi qaydası və prosedurları ilə bağlı təlim təşkil edilib.

Tədbir zamanı qiymətləndirmə prosesində tətbiq olunan əsas prinsiplər, meyarlar və düsturlar haqqında məlumat verilib.

Təlim, Azərbaycan Respublikasının Prezidenti İlham Əliyevin 2018-ci il 23 noyabr tarixli 739 nömrəli Sərəncamı ilə təsdiq edilmiş “Azərbaycan Respublikasında dövlət qulluğunun inkişafına dair 2019−2025-ci illər üçün Strategiya”nın Fəaliyyət Planında nəzərdə tutulan tədbirlər çərçivəsində keçirilib.

Sessiyanı Dövlət İmtahan Mərkəzinin Dövlət Strategiyası ilə iş və insan kapitalının inkişafı şöbəsinin aparıcı məsləhətçisi Gündüz Əhmədli aparıb. O, iştirakçılara dövlət qulluqçularının xidməti fəaliyyətinin qiymətləndirilməsi anlayışı, bu prosesin həyata keçirildiyi dövrlər, meyarlar və əmək intizamı ilə bağlı ətraflı məlumat təqdim edib. Həmçinin qiymətləndirmə zamanı tez-tez rast gəlinən səhvlər və qarşıya çıxan problemlər haqqında qarşılıqlı müzakirələr təşkil olunub.

Tədbir, iştirakçıların peşəkar biliklərini artırmaq və xidməti fəaliyyətin səmərəli idarə olunmasını təmin etmək məqsədini daşıyıb.

Təlimin sonunda iştirakçıların sualları cavablandırılıb və qiymətləndirmə mexanizmlərinə dair praktik məsələlər müzakirə edilib.