Böyük Qayıdışa dair I Dövlət Proqramı çərçivəsində Qaçqınların və Məcburi Köçkünlərin İşləri üzrə Dövlət Komitəsinin əməkdaşları üçün “Məşğulluq və sahibkarlıq fəaliyyətinin təşkili” mövzusunda təlim keçirilib. Tədbir sosial-iqtisadi tədbirlərin dəstəklənməsi məqsədilə effektiv məşğulluq və sahibkarlıq fəaliyyətinin təşkili mövzusunda beynəlxalq təcrübələrin öyrənilməsi, bu istiqamətdə biliklərin artırılması və qabaqcıl yanaşmaların tətbiqi imkanlarının müzakirəsinə həsr olunub. Təlimin keçirilməsində əsas məqsəd komitə əməkdaşlarının məşğulluq və sahibkarlıq sahəsində bilik və bacarıqlarını təkmilləşdirmək, onların bu istiqamətdə peşəkar vərdişlərini daha da inkişaf etdirmək olub. İştirakçılara həmçinin gələcəkdə bu bilikləri öz fəaliyyət sahələrində tətbiq etməyə dair tövsiyələr verilib. Tədbirin sonunda iştirakçıların sualları cavablandırılıb, interaktiv müzakirələr aparılıb və fəal iştirak edən 29 əməkdaşa sertifikat təqdim edilib. Bu təlimin nəticəsində əməkdaşların sözügedən sahələrdə biliklərinin artırılması və onların daha effektiv fəaliyyət göstərmələri üçün zəmin yaradılması hədəflənib. Qeyd edək ki, silsilə şəklində cari ilin sonunadək icrası planlaşdırılan təlimlər Böyük Qayıdışa dair I Dövlət Proqramı”nın Tədbirlər Planının “Əhalinin geri qayıdışı və ərazilərdə dayanıqlı icmaların yaradılması”, 3-cü prioritet istiqaməti çərçivəsində "Geri qayıdan əhaliyə dəstək məqsədilə xüsusi qaynar xəttin yaradılması və onların adaptasiyası ilə bağlı tədbirlərin daha səmərəli həyata keçirilməsi üçün müvafiq dövlət orqanları əməkdaşlarının peşəkar təlimlərə cəlb olunması" (3.1.5.) fəaliyyət istiqaməti üzrə həyata keçirilir.
