Dekabrın 12-də Qaçqınların və Məcburi Köçkünlərin İşləri üzrə Dövlət Komitəsinin kollektivi Fəxri xiyabanda ümummilli lider Heydər Əliyevin məzarını ziyarət edib.
Müstəqil Azərbaycan dövlətinin banisi və memarı Heydər Əliyevin xatirəsi hər bir azərbaycanlı üçün əzizdir. Ermənistan-Azərbaycan Dağlıq Qarabağ münaqişəsi nəticəsində yurd-yuvasını tərk etmiş qaçqınlar və məcburi köçkünlər də hər zaman ulu öndərin diqqət və qayğısını hiss ediblər. Məhz onun təşəbbüsü və rəhbərliyi ilə qaçqınların və məcburi köçkünlərin problemlərinin həlli üzrə ilk dövlət proqramı hazırlanıb və icra edilib. Ümummili lideri Heydər Əliyev tərəfindən əsası qoyulan uğurlu neft strategiyası öz bəhrəsini verməyə başladıqdan sonra Dövlət Neft Fondunun ilkin vəsaiti məcburi köçkünlərin mənzil-məişət şəraitinin yaxşılaşdırılmasına yönəldilib. Eyni zamanda məhz ulu öndərin təşəbbüsü və çağırışı ilə beynəlxalq təşkilatlar məcburi köçkünlərə yardımlar göstərməyə başladı ki, bununla da humanitar fəlakətin qarşısı alındı.
Qaçqınlar və məcburi köçkünlərlə iş sahəsində əsası ulu öndər Heydər Əliyev tərəfindən qoyulmuş dövlət siyasətini möhtərəm Prezident cənab İlham Əliyev uğurla davam etdirir. Azərbaycan dövləti bu problemlərin həlli istiqamətində müntəzəm iş aparır, Prezident İlham Əliyevin müəyyənləşdirdiyi prioritet vəzifələr ardıcıllıqla yerinə yetirilir. Birinci vitse-prezident xanım Mehriban Əliyevanın təşəbbüsü və rəhbərliyi ilə böyük layihələr həyata keçirilir. Məcburi köçkünlərin sosial müdafiəsi, mənzil-məişət şəraitinin yaxşılaşdırılması, məşğulluq imkanlarının artırılması məsələlərinə daim diqqət göstərilir.
Məcburi köçkünlərin mənzil-məişət şəraitinin yaxşılaşdırılması üçün bütün zəruri infrastruktur obyektləri ilə təchiz edilmiş 106 qəsəbə istifadəyə verilib. Bu ilin sonunadək həm Bakı şəhərində, həm də müxtəlif rayonlarda, o cümlədən Şirvan, Kürdəmir, Ucar, Göyçay, Göygöl və Ağcabədi rayonunun Taxtakörpü qəsəbəsində yeni yaşayış komplekslərinin tikintisinin başa çatdırılması nəzərdə tutulub. Beləliklə, daha 3700 məcburi köçkün ailəsinin yeni mənzillərlə təmin olunacaq. Bu istiqamətdə tədbirlər ardıcıl xarakter daşıyır.
Qaçqınların və Məcburi Köçkünlərin İşləri üzrə Dövlət Komitəsinin kollektivi Ulu Öndər Heydər Əliyevin xatirəsini dərin ehtiram hissi ilə yad edib, məzarı önünə gül düzüblər.
