Avropa Parlamenti Azərbaycanla bağlı son qərəzli qətnaməni qəbul etməklə öz riyakarlığını, ikiüzlülüyünü bir daha nümayiş etdirdi

XƏBƏRLƏR

Çap et 2601

Mətbuat xidmətinin məlumatı 14 Sentyabr, 2015

Sentyabrın 14-də Azərbaycan Respublikasının Qaçqınların və Məcburi Köçkünlərin İşləri üzrə Dövlət Komitəsində Avropa Parlamentinin Azərbaycanla bağlı qəbul etdiyi qərəzli qətnamənin müzakirəsi məqsədilə tədbir keçirilib. Tədbirdə əraziləri işğal olunmuş rayonların icra hakimiyyətlərinin başçıları, həmin rayonlardan seçilmiş deputatlar, Dövlət Komitəsinin əməkdaşları iştirak ediblər. Tədbirdə çıxış edən Azərbaycan Respublikası Baş nazirinin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov Avropa Parlamentinin bu qərəzli qətnaməsinin Azərbaycan ictimaiyyətində haqlı narazılıq doğurduğunu bildirib. Baş nazirin müavini bu qətnamədə əksini tapan fikirlərin tamamilə əsassız ittihamlar və tələblər olduğunu vurğulayıb. Əli Həsənov deyib ki, Avropa Parlamentinin üç əsas səlahiyyəti var: Avropa İttifaqına dair qanunlar qəbul etmək, həmin qanunların yerinə yetirilməsinə nəzarət etmək və Avropa İttifaqının büdcəsinin icrasına nəzarət etmək. Bu səlahiyyətlər Avropa İttifaqına üzv ölkələr tərəfindən müəyyənləşdirilib. Azərbaycanla bağlı qətnamə qəbul etmək isə Avropa Parlamentinin səlahiyyətlərinə daxil deyil. Buna görə də bu qətnamənin qəbulu yersizdir və suveren bir dövlətin daxili işlərinə müdaxilədir. Diqqətə çatdırılıb ki, Avropa Parlamentinin belə addım atması, ümumiyyətlə son illər Avropanın bəzi ölkələrində Azərbaycana qarşı münasibətin dəyişməsi respublikamızın əldə etdiyi böyük nailiyyətlərlə əlaqədar yaranan qısqanclıqdan, paxıllıqdan irəli gəlir. Avropanın ən böyük tədbirləri Azərbaycanda keçirilir. Xüsusilə, ilk Avropa Oyunlarının Azərbaycanda böyük uğurla keçirilməsindən sonra Avropada Azərbaycana qarşı belə qərəzli addımların atılacağı gözlənilirdi. Bu, qısqanclığın, paxıllığın və xüsusilə erməni diasporunun təsirinin nəticəsidir. Avropa Parlamentinin özü korrupsiyaya bulaşmış bir qurumdur. Bu qurumun üzvlərinin nə ilə məşğul olduqları hamımıza çox yaxşı məlumdur. Bu gün dövlətimizin başçısı İlham Əliyevin, Heydər Əliyev Fondunun prezidenti Mehriban Əliyevanın gördüyü işlərdən, Azərbaycanın əldə etdiyi nailiyyətlərdən, xüsusilə ordumuzun güclənməsindən qorxuya düşən erməni diasporu hərəkətə keçib və qərəzli addımların atılmasında onun böyük rolu var. Baş nazirin müavini bildirib ki, hazırda Avropa 50-60 min qaçqının əlində qalıb, hansı qərarı qəbul etmək barədə çətinlik çəkir. Ancaq görün Azərbaycan 1 milyondan çox qaçqın və məcburi köçkünün problemlərinin həlli istiqamətində hansı işləri görüb?! Bu sahənin idarə olunması Prezident İlham Əliyev tərəfindən tam təmin edilib. Təsadüfi deyil ki, BMT-nin qaçqınlar üzrə ali komissarı Azərbaycan Prezidenti tərəfindən bununla bağlı görülən işlərin dünya üçün bir nümunə olduğunu deyir. Əli Həsənov bildirib ki, bu gün biz Avropada qaçqınlarla nə dərəcədə kobud rəftar edilməsinin şahidi oluruq. Özləri isə insan hüquqlarından, demokratiyadan danışırlar. İyirmi ildən çoxdur ki, bizim 1 milyondan çox qaçqın və məcburi köçkünümüzün hüquqları pozulur. Avropa Parlamenti niyə susur?! Avropa Parlamenti Azərbaycanda konkret cinayət əməllərinə görə qanunvericiliklə mühakimə olunan iki-üç nəfərin hüquqlarının pozulduğunu deyir. Məgər Avropa ölkələrində cinayət törədənlər məhkəmə qanunu ilə mühakimə olunanda onların hüquqları pozulur?! Niyə onlar Avropa ölkələrində polisin insanlara qarşı tətbiq etdiyi zorakılıqdan, Ermənistanda insanlara qarşı həyata keçirilən kütləvi zorakılıqdan danışmırlar?! Budur onların iç üzü. Bu, riyakarlıqdır, ikiüzlülükdür. Milli Məclisin deputatı Bəxtiyar Əliyev deyib ki, Azərbaycanda insan hüquq və azadlıqlarının, söz və mətbuat azadlığının tam təmin olunduğu bir vaxtda reallığı əks etdirməyən belə bir qətnamənin qəbul olunması yolverilməzdir. Azərbaycanda demokratik prinsiplərin möhkəmləndirilməsi, vətəndaş cəmiyyəti institutlarının daha da inkişaf etdirilməsi, onların fəaliyyətinin gücləndirilməsi istiqamətində ardıcıl siyasət həyata keçirilir. Avropanın özündə isə insan haqlarının pozulması ilə bağlı ciddi problemlər mövcuddur. Bu qətnaməni hazırlayanların heç Azərbaycan reallıqlarından xəbəri yoxdur. Buna görə də Avropa Parlamentinin bu addımı ikili standartlarla yanaşmadan, qərəzdən, riyakarlıqdan baş bir şey deyil. Füzuli Rayon İcra Hakimiyyətinin başçısı Alı Alıyev deyib ki, Avropa Parlamentinin bu qətnaməni qəbul etməsi ölkəmizi, onun uğurlarını gözdən salmağa çalışan çirkin kampaniyanın tərkib hissəsidir. Bu kampaniyanın təşkilatçıları isə Azərbaycandakı sabitliyi, ölkəmizdəki sosial-iqtisadi inkişafı gözü götürməyən qüvvələrdir. Bu gün Azərbaycan xalqı öz iradəsini ifadə edib. Xalqımız Prezident İlham Əliyevin ətrafında sıx birləşib, onun yürütdüyü siyasəti tam dəstəkləyir. Kəlbəcər rayonundan məcburi köçkün Şəlalə Məmmədova bildirib ki, Azərbaycanın sürətli inkişafı, insanların rifahının yaxşılaşdırılması, ölkəmizdə fundamental hüquq və azadlıqların qorunması Avropa Parlamentinin hər bir üzvünə yaxşı məlumdur. Avropa parlamentarilərinə yaxşı məlum olan digər həqiqət isə Ermənistanın təcavüzü nəticəsində yüz minlərlə azərbaycanlı qaçqın və məcburi köçkünün pozulan hüquqlarıdır. Təəssüf ki, onların hüquqlarının pozulması, doğma yurd-yuvalarına qayıtması barədə qətnamə müəllifləri hər hansı tələb irəli sürmürlər. İyirmi ildən artıqdır ki, bir milyondan çox insanın kütləvi surətdə pozulmuş hüquqlarına biganə qalan təşkilatın həqiqətə uyğun olmayan faktlar əsasında Azərbaycana qarşı əsassız ittihamlar irəli sürməsi ədalətsizlikdir. Qubadlı Rayon İcra Hakimiyyətinin başçısı Malik İsaqov qeyd edib ki, heç bir təşkilatın müstəqil bir ölkənin daxili işlərinə qarışmağa haqqı yoxdur. Antiazərbaycan qüvvələrin qəbul etdiyi bu qətnamə qərəzlidir və ölkəmizə qarşı təzyiq məqsədi daşıyır. Müəyyən xarici dairələr bəzi ölkələr kimi Azərbaycanı da alət kimi istifadə etməyə çalışırlar. Onları nə Azərbaycan xalqı, nə də Azərbaycanın həqiqətləri maraqlandırır. Bu kimi təşkilatlar yalnız və yalnız müəyyən dairələrin tapşırıqlarını yerinə yetirərək belə bir qərəzli mövqedə dayanır, qeyri-obyektiv qətnamələr qəbul edilir. Milli Məclisin deputatı Elman Məmmədov Avropa Parlamentinin tarixən Ermənistanın mənafeyinə uyğun sənədlər qəbul etdiyini faktlarla diqqətə çatdırıb. O bildirib ki, bəzi antiazərbaycançı qüvvələr ölkəmizin beynəlxalq müstəvidə nüfuzuna zərbə vurmaq üçün fürsət axtarır, çox mühüm hadisələr ərəfəsində qərəzli kampaniyalar həyata keçirirlər. Avropa Parlamentində bundan əvvəlki qətnamə birinci Avropa Oyunları ərəfəsində qəbul olunmuşdu. Bu dəfə isə parlament seçkiləri kampaniyası dövründə belə bir sənəd qəbul edilib. Qətnamədə əksini tapan fikirlərin hamısı qərəzli, qeyri-obyektivdir. “Azərbaycan Respublikası Dağlıq Qarabağ bölgəsinin Azərbaycanlı İcması” İctimai Birliyinin Əlaqələndirmə Şurasının sədri, Qarabağ Araşdırmalar Mərkəzinin rəhbəri Elçin Əhmədov deyib ki, Avropa Parlamentinin qətnaməsində irəli sürülən iddiaların yanlış məlumatlar əsasında hazırlandığı, subyektiv və qərəzli xarakter daşıdığı açıq-aydın görünür. Qətnamədə ayrı-ayrı halların qərəzli şəkildə təqdim olunması və ümumiləşdirmə yolu ilə bütün ölkəyə şamil edilməsi onun hazırlanma metodologiyasının qüsurlu və antiazərbaycan xarakterli olduğunu təsdiq edir. Bu qətnamənin qəbul edilməsi hazırda Avropada, Qərbin təşəbbüsü ilə yaradılan əksər beynəlxalq qurumlarda, xüsusilə Avropa Parlamentində ikili standartlar və islamofob əhval-ruhiyyənin hökm sürdüyünü göstərir. Tədbirə yekun vuran Əli Həsənov Avropa Parlamentinin bu qətnaməsinin Azərbaycana qarşı qərəzli münasibətin bir daha göstəricisi olduğunu bildirib. Sonda Azərbaycanda yaşayan qaçqın və məcburi köçkünlərin adından Prezident İlham Əliyevə və Avropa Parlamentinə müraciətlər qəbul olunub. Azərbaycan Prezidentinə müraciətdə deyilir: “Möhtərəm cənab Prezident! Biz bu gün Qaçqınların və Məcburi Köçkünlərin İşləri üzrə Dövlət Komitəsində əraziləri işğal olunmuş rayonların icra hakimiyyətlərinin başçılarının, həmin rayonlardan seçilmiş deputatların iştirakı ilə keçirilmiş tədbirdə Avropa Parlamenti tərəfindən 2015-ci il sentyabrın 10-da qəbul edilmiş ədalətsiz, qərəzli qətnaməni geniş müzakirə etdik. Biz, tədbir iştirakçıları ölkəmizdə olan bir milyon iki yüz mindən çox qaçqın və məcburi köçkünün adından Avropa Parlamentinin qəbul etdiyi bu qətnaməni birmənalı olaraq qətiyyətlə pisləyir, bunu qısa bir müddətdə Sizin rəhbərliyinizlə əldə edilmiş uğurları gözü götürməyən, antiazərbaycan mövqeli, erməni diasporunun maliyyə dəstəyinə satılan bəzi deputatların məqsədli şəkildə təşkil etdikləri növbəti çirkin kampaniya kimi qiymətləndiririk. Biz ölkəmizdə keçirilən mühüm beynəlxalq tədbirlər və seçkilər ərəfəsində Avropa Parlamentinin belə qərəzli, qarayaxma cəhdlərinin çox şahidi olmuşuq. Avropanı düçar olduğu enerji təhlükəsindən xilas etmək yolunda Sizin heç bir təhdiddən çəkinməyərək qəti addımlar atdığınız bir zamanda onların nümayəndələrinin bu cür çirkin vasitələrə əl atması heç bir məntiqə və ölçüyə uyğun gəlmir. Möhtərəm cənab Prezident, Siz müstəqil dövlətin rəhbəri olaraq müstəqil siyasət yürüdürsünüz, Azərbaycanı analoqu olmayan inkişaf yolu ilə irəli aparırsınız, ölkəmizi dünyanı çalxalayan maliyyə böhranından, çirkin siyasi çəkişmələrdən bacarıqla qoruyursunuz. Biz qaçqınlar və məcburi köçkünlər Sizin bu ağıllı, düşünülmüş siyasətinizi hər zaman dəstəkləmişik və bundan sonra da atacağınız hər bir addımı fəal müdafiə edəcəyik. Bu cür hadisələr bir daha onu göstərir ki, biz daha fəal və ehtiyatlı olmalı, qabaqlayıcı tədbirlər görməli, dövlətimizin müdafiəsində vahid cəbhədə, Sizin ətrafınızda daha sıx birləşməliyik. Azərbaycan xalqı kimi, biz qaçqınlar və məcburi köçkünlər də Avropa Parlamentindən Azərbaycana qarşı qəbul olunmuş bu ədalətsiz qətnaməni ləğv etməyi, qətnamənin lehinə səs vermiş deputatların təmsil olunduqları dövlətlərin rəhbərlərindən isə ölkələrini Avropa Parlamentində daha ədalətli nümayəndələrlə əvəz etməyi tələb edirik. Qüdrətli və qüvvətli Azərbaycan naminə fəaliyyətinizdə Sizə uğurlar diləyirik”.