Məcburi köçkünlərin sosial problemlərinin həlli, rifah halının yüksəldilməsi hər zaman dövlətin diqqət mərkəzindədir. Prezident İlham Əliyev bu istiqamətdə həyata keçirilən işləri, keçmiş məcburi köçkünlərin doğma yurdlarına könüllü, təhlükəsiz və ləyaqətlə qayıdışını dövlət siyasətinin strateji istiqamətlərindən biri kimi müəyyən edib. Birinci vitse-prezident Mehriban xanım Əliyevanın bu kateqoriyadan olan həmvətənlərimizə həssas münasibəti onlarda dərin minnətdarlıq hissi doğurur.
Dövlətimizin başçısının tapşırığı əsasında, aztəminatlı məcburi köçkün ailələrdən olan şagirdlərin qış üst geyimi ilə təmin edilməsini Qaçqınların və Məcburi Köçkünlərin İşləri üzrə Dövlət Komitəsi daim diqqətdə saxlayır. Belə ki, respublikamızın müxtəlif regionlarında, rayon mərkəzlərindən kənarda yerləşən kəndlərdə yaşayan aztəminatlı məcburi köçkün ailələrdən olan məktəbliləri üçün bu il də komitənin Təchizat və İstehsalat İdarəsi tərəfindən müəyyən yaş qrupları üzrə gödəkçələr göndərilib, eləcə də komitəyə fərdi qaydada ərizə ilə müraciət edən məcburi köçkün övladlarına geyimlərin verilməsi təmin edilib.
Geyimlər Təchizat və İstehsalat İdarəsinin Bakı şəhərində və respublikamızın müxtəlif regionlarında yerləşən, əsasən, məcburi köçkünlərin çalışdıqları tikiş-toxuculuq sexlərində istehsal olunub.
Komitə sədrinin müvafiq əmri əsasında, 2025-2026-cı tədris ili üçün Ağdam rayonuna 2000 gödəkçə, Xocavənd rayonuna 500 gödəkçə, Şuşa rayonuna 500 gödəkçə, Kəlbəcər rayonuna 500 gödəkçə, Füzuli rayonuna 600 gödəkçə, Cəbrayıl rayonuna 600 gödəkçə, Qubadlı rayonuna 500 gödəkçə, Zəngilan rayonuna 250 gödəkçə, Xocalı rayonuna 600 gödəkçə, Dövlət Komitəsinin Ağcabədi rayonunda yerləşən regional nümayəndəliyinə 600, Dövlət Komitəsinin Bərdə rayonunda yerləşən regional nümayəndəliyinə 600, Dövlət Komitəsinin Gəncə şəhərində yerləşən regional nümayəndəliyinə 1100, Dövlət Komitəsinin Qax rayonunda yerləşən regional nümayəndəliyinə 600 gödəkçə təqdim edilib.
Geyimlər aztəminatlı məcburi köçkün ailələrin övladlarına humanitar yardım olaraq pulsuz verilir.
