Azərbaycan Respublikası Qaçqınların və Məcburi Köçkünlərin İşləri üzrə Dövlət Komitəsi “Yaşıl dünya naminə həmrəylik ili” çərçivəsində daha bir tədbir təşkil edib. Azərbaycan Respublikası Prezident Administrasiyasının 2024-cü il 20 fevral tarixli 24 nömrəli sərəncamının 4.8-ci yarımbəndinə müvafiq olaraq təşkil edilən aksiya istifadə edilmiş kağızların təkrar emal müəssisələrinə təhvil verilməsi, bu sahədə vətəndaşların təşviq edilməsi, qlobal çirklənmə və təbiətin mühafizə olunması istiqamətində dayanıqlı həll və inkişaf yollarına dəstək məqsədi daşıyır.
Bakı şəhərinin Qaradağ rayonunun Müşfiqabad qəsəbəsində məcburi köçkünlərin müvəqqəti məskunlaşdığı yaşayış kompleksində “İstifadə edilmiş kağız daşıyıcılara yenidən həyat verək, dünyamızı qoruyaq” devizi ilə keçirilən tədbirdə sakinlər kağız daşıyıcılardan səmərəli və qənaətlə istifadə ilə bağlı məlumatlandırılıb, evlərindəki istifadə olunmayan kağız daşıyıcıları təkrar emal qutularına təhvil verməyə təşviq ediliblər. Məcburi köçkünlər aksiyada fəal iştirak edib, verilən məlumatlardan sonra ətraf mühitin qorunması məsələlərində daha diqqətli olacaqlarını bildiriblər.
Xatırladaq ki, “Yaşıl dünya naminə həmrəylik ili” çərçivəsində komitə tərəfindən məlumatlandırıcı təlimlərin, video və posterlərin hazırlanması və təbliği mütəmadi olaraq həyata keçirilir.
