İvo Vayql: Dağlıq Qarabağ probleminin həlli beynəlxalq siyasətin prioritetinə çevrilməlidir

XƏBƏRLƏR

Çap et 1230

Mətbuat xidmətinin məlumatı 29 Noyabr, 2011

«Bütün dünya Ermənistanın Azərbaycan torpaqlarını işğal etdiyini bilir» Baş nazirin müavini – Dövlətqaçqınkomun sədri cənab Əli Həsənov 2011-ci il 29 noyabr tarixdə ölkəmizdə səfərdə olan Avropa Parlamentinin Xarici Əlaqələr Komitəsinin üzvü İvo Vayqlı qəbul etmişdir. Qarşılıqlı fikir mübadiləsi şəraitində keçən görüşdə Avropa Parlamenti deputatının ölkəmizə səfər proqramı çərçivəsində bir gün əvvəl məcburi köçkünlərin həyat şəraiti ilə tanış olmaq məqsədilə Ağdam rayonu ərazisində yeni salınmış qəsəbəyə səfərini, burada məcburi köçkünlərlə keçirdiyi görüşü, həmçinin problemin həllində Azərbaycanın haqq işi ilə bağlı söylədiyi fikirləri yüksək dəyərləndirən Ə.Həsənov qonağın diqqətinə çatdırmışdır ki, bu gün Azərbaycanın ən böyük problemi Ermənistan-Azərbaycan, Dağlıq Qarabağ münaqişəsidir. Qonağın geniş diplomatik təcrübəyə malik olduğunu bir daha diqqətə çatdıran Baş nazirin müavini onu da bildirmişdir ki, bu problem təkcə Azərbaycana deyil, bütün regiona təhlükədir. Münaqişə, onun yaranma səbəbləri və bu günkü reallıqlar, eləcə də münaqişənin həllində yaranmış problemlərlə bağlı qonağa ətraflı məlumat verən Ə.Həsənov münaqişənin beynəlxalq ictimaiyyətin də diqqət mərkəzində olduğunu, lakin bütün bunlara baxmayaraq Azərbaycan torpaqlarının hələ də işğal altında qaldığını və qonağın da bütün bunlardan məlumatlı olduğunu diqqətə çatdıraraq bildirmişdir ki, bu məsələ ilə bağlı olduqca güclü hüquqi baza vardır, işğalçı qoşunların işğal olunmuş ərazilərdən qeyd-şərtsiz çıxarılmasını tələb edən qətnamələrin olmasına baxmayaraq bunlar yerinə yetirilmir. Bu səbəbdən də belə ədalətsizlik təkcə Azərbaycanın deyil, bütün regionun təhlükəsizliyinə və sabitliyinə böyük həmlədir, təhlükədir. Qonağı maraqlandıran məsələlərlə bağlı fikir mübadiləsi aparılan görüşdə Sloveniyadan olan İvo Vayql Dağlıq Qarabağ münaqişəsi, ATƏT-in Minsk qrupunun fəaliyyəti ilə yaxından tanış olduğunu, təmsil etdiyi qurumda münaqişənin həlli ilə bağlı Azərbaycanın haqq işinin qalib gəlməsi üçün bacarıq və səylərini əsirgəməməyə çalışdığını önə çəkərək həmçinin qeyd etmişdir ki, bu problem artıq diplomatlar tərəfindən həll ediləsi problem deyil. Bu baxımdan Avropa İttifaqının da münaqişənin həllində vasitəçilik missiyasını yerinə yetirən ATƏT-in Minsk qrupunun həmsədrlərindən biri olmasının vacibliyini onunla əlaqələndirmişdir ki, belə olduğu halda daha çox və effektli tədbirlər həyata keçirmək mümkündür: «Dağlıq Qarabağ probleminin həlli beynəlxalq siyasətin prioritetinə çevrilməlidir. Bu münaqişə nəticəsində doğma torpaqlarından didərgin düşmüş məcburi köçkünlər üçün Azərbaycan hökumətinin gördüyü işləri yüksək dəyərləndirən qonaq onu maraqlandıran məsələlərlə bağlı ətraflı məlumata görə minnətdarlığını bildirmiş, Azərbaycana səfəri, məcburi köçkünlərlə görüşü, Ermənistan-Azərbaycan, Dağlıq Qarabağ münaqişəsi və problemin həlli yolları ilə bağlı ətraflı məqalə hazırlayacağını da vəd etmişdir.