08-09 avqust tarixlərdə Azərbaycan Respublikası Qaçqınların və Məcburi Köçkünlərin İşləri üzrə Dövlət Komitəsi əməkdaşları üçün “Qaydışda əhalinin adaptasiyası ilə bağlı beynəlxalq təcrübənin öyrənilməsi” və “Repatriasiyanın hüquqi əsasları” mövzularında təlimlər təşkil olunub. Böyük Qayıdışa dair I Dövlət Proqramının Tədbirlər Planınna uyğun olaraq Arzu Quliyeva və Mətanət Əsgərovanın moderatorluğu ilə keçirilən iki günlük təlimlərdə komitənin 30-dan çox əməkdaşı iştirak edib.

Qarabağın və Şərqi Zəngəzurun erməni işğalı nəticəsində dağıdılıb məhv edilmiş kənd və şəhərlərində Prezident İlham Əliyevin rəhbərliyi ilə sürətli bərpa-quruculuq işlərinin aparıldığı, keçmiş məcburi köçkünlərin öz ata-baba torpaqlarına təhlükəsiz, könüllü və ləyaqətlə qayıdışına zəruri şərait yaradıdığı, indiyədək bu kateqoriyadan olan 8 minədək həmvətənimizin həmin yerlərə köçürülərək daimi məskunlaşdırıldığı diqqətə çatdırılıb. Bildirilib ki, Böyük Qayıdış prosesinin effektli təşkili üçün beynəlxalq təcrübənin öyrənilməsi və yerli şəraitə uyğun tətbiq edilməsi, mövcud qanunvericiliyin tələblərinə əməl olunması, köçürülmə məsələlərində vətəndaş iştirakçılığına imkan yaradılması vacib məsələlərdir. Təlimlərdə iştirak edən əməkdaşlara bunlar barədə ətraflı məlumat verilib, onların sualları cavablandırılıb.

Böyük Qayıdışa dair I Dövlət Proqramının Tədbirlər Planının "Geri qayıdan əhaliyə dəstək məqsədilə xüsusi qaynar xəttin yaradılması və onların adaptasiyası ilə bağlı tədbirlərin daha səmərəli həyata keçirilməsi üçün müvafiq dövlət orqanları əməkdaşlarının peşəkar təlimlərə cəlb olunması" (3.1.5.) fəaliyyət istiqaməti üzrə təlimlərin silsilə şəklində davam etdirilməsi nəzərdə tutulur.