Azərbaycanda səfərdə olan Daxili Köçürülmə üzrə Monitorinq Mərkəzinin direktoru Aleksandra Bilakın başçılıq etdiyi nümayəndə heyəti Bakı şəhərinin Yasamal rayonunda, Azərbaycan Memarlıq və İnşaat Universitetinin yataqxanasında müvəqqəti məskunlaşmış məcburi köçkünlərlə görüşüb, onların yaşayış şəraiti ilə tanış olub.

Qaçqınların və Məcburi Köçkünlərin İşləri üzrə Dövlət Komitəsi sədrinin müavini Fuad Hüseynov nümayəndə heyətinə Ermənistan-Azərbaycan Dağlıq Qarabağ münaqişəsi nəticəsində doğma yurdundan didərgin düşmüş soydaşlarımızın vəziyyəti haqqında məlumat verib. Qeyd edilib ki, onların əksəriyyəti paytaxda və bölgələrdə müxtəlif təyinatlı bina və tikililərdə məskunlaşmağa, çətin şəraitdə yaşamağa məcbur olub. Bu kateqoriyadan olan şəxslərin problemlərinin həlli dövlətin sosial siyasətinin prioritetlərindəndir. Prezident İlham Əliyev onların mənzil-məişət şəraitinin və maddi rifahının yaxşılaşdırılması, məşğulluğunun artırılması üçün məqsədyönlü tədbirlər həyata keçirir. Birinci vitse-prezident xanım Mehriban Əliyevanın məcburi köçkünlərlə bağlı işlərin sürətləndirilməsində mühüm xidmətləri vardır və bu məsələni nəzarətdə saxlayır.

Qonaqlar daha sonra Füzuli rayonundan məcburi köçkün Xatirə Adıgözəlövanın məskunlaşdığı otaqda olub və ailə üzvləri ilə söhbət ediblər. Xatirə xanım doğma yurdu necə tərk etmək məcburiyyətində qaldıqları, köçkünlüyün ilk illərində hansı məhrumiyyətləri yaşadıqları barədə danışıb, onlara göstərilən dövlət qayğısından söz açıblar.

Daha sonra nümayəndə heyəti Abşeron rayonunun Masazır qəsəbəsində məcburi köçkünlər üçün salınmış qəsəbədə olub. Zəngilan Rayon Icra Hakimiyyətinin başçısı Ramiz Həsənov qonaqlara qəsəbədəki vəziyyət, zəngilanlı məcburi köçkünlərin mövcud vəziyyəti haqqında məlumat verib.

Qonaqlar qəsəbədə yaradılan şəraitlə tanış olub, sakinlərlə söhbətləşib, eyni zamanda Zəngilan Rayon Tarix diyarşünaslıq muzeyinə, 33 saylı orta məktəbə və bağçaya baş çəkiblər.