Qaçqınların və Məcburi Köçkünlərin İşləri üzrə Dövlət Komitəsinin sədri Rövşən Rzayev Beynəlxalq Qızıl Xaç və Qızıl Aypara Cəmiyyətləri Federasiyasının baş katibi Elhadc As Sinin başçılıq etdiyi nümayəndə heyəti ilə görüşüb. Görüşdə qonaqlara Ermənistanın Azərbaycana qarşı hərbi təcavüzü və davam edən işğalçılıq siyasəti nəticəsində yaranmış humanitar problemlər, o cümlədən doğma torpaqlarından didərgin salınmış 1 milyon 200 min azərbaycanlının ağır məhrumiyyətlərlə üzləşməsi barədə ətraflı məlumat verilib. Qeyd olunub ki, BMT Təhlükəsizlik Şurasının işğalçı qüvvələrin dərhal, tam və qeyd-şərtsiz Azərbaycan torpaqlarından çıxarılması ilə bağlı 4 qətnaməsi hələ də icra edilməyib. Görüşdə qaçqınların və məcburi köçkünlərin çoxsaylı problemlərinin həlli ilə bağlı Azərbaycan dövlətinin daxili imkanlar hesabına zəruri tədbirlər həyata keçirdiyi bildirilib. Prezident İlham Əliyevin məcburi köçkünlərin problemlərinin həlli, mənzil-məişət şəraitinin yaxşılaşdırılması üçün ardıcıl iş apardığı vurğulanıb. Birinci vitse-prezident xanım Mehriban Əliyevanın bu sahədəki mühüm və təxirəsalınmaz layihələrin icrasını daim diqqətdə saxladığı qeyd edilib. Dövlət komitəsinin sədri Beynəlxalq Qızıl Xaç və Qızıl Aypara Cəmiyyətləri Federasiyasının Azərbaycana yenicə müstəqillik qazandığı dövrdə, ən çətin vaxtlarda böyük diqqət yetirdiyini, vaxtilə çadır düşərgələrində məcburi köçkünlərə zəruri humanitar yardım göstərdiyini vurğulayıb, təşkilatın həyata keçirdiyi fəaliyyətə görə təşəkkür edib. Qeyd edilib ki, Federasiya ilə Azərbaycan hökuməti arasında yeni imzalanmış Memorandum qarşılıqlı maraq doğuran sahələrdə əməli əməkdaşlığın genişləndirilməsi üçün münbit şərait yaradacaq. Beynəlxalq Qızıl Xaç və Qızıl Aypara Cəmiyyətləri Federasiyasının baş katibi Elhadc As Si təmsil etdiyi qurumla Azərbaycan dövləti arasında əməkdaşlığı yüksək qiymətləndirib, məcburi köçkünlərlə bağlı layihələrin bundan sonra da həyata keçirilməsində maraqlı olduğunu diqqətə çatdırıb. Görüşdən sonra Beynəlxalq Qızıl Xaç və Qızıl Aypara Cəmiyyətləri Federasiyasının nümayəndə heyəti Yasamal rayonunda məcburi köçkünlərin müvəqqəti məskunlaşdığı yataqxanada və Abşeron rayonunun Masazır qəsəbəsi ərazisindəki yaşayış kompleksində vəziyyətlə tanış olub. Sonra jurnalistlər üçün brifinq təşkil edilib.
