Qaçqınların və Məcburi Köçkünlərin İşləri üzrə Dövlət Komitəsinin sədrinin müavini Fuad Hüseynov BMT-nin “İqtisadi, sosial və mədəni hüquqlar haqqında Beynəlxalq Pakt” üzrə Azərbaycan Respublikasının üzərinə götürdüyü öhdəlikləri yerinə yetirilməsi ilə bağlı dördüncü dövrü məruzəsinin təqdimatında çıxış edib.

Dövlət Komitəsi sədrinin müavini Ermənistanın işğalçılıq siyasəti və bunun nəticəsində qaçqın və məcburi köçkün olan 1milyondan çox soydaşımız haqqında məlumat verib, Azərbaycanda hər on nəfərdən birinin qaçqın, məcburi köçkün statusu daşıdığı qeyd edilib. Bu kateqoriyadan olan vətəndaşlarla iş sahəsində həyata keçirilən dövlət siyasəti haqqında məlumat verilib. Bildirilib ki, Prezident İlham Əliyev məcburi köçkünlərə böyük diqqət və qayğı göstərir, Birinci vitse-prezident xanım Mehriban Əliyeva onların problemlərinin həlli üçün məqsədyönlü iş aparır.

Azərbaycan Respublikasının Prezidenti, Müzəffər Ali Baş Komandan İlham Əliyevin rəhbərliyi ilə rəşadətli ordumuzun işğalçı Ermənistana qarşı apardığı “Dəmir yumruq” əks-həmlə hərbi əməliyyatı nəticəsində ərazi bütövlüyümüzün, məcburi köçkünlərin doğma yurdlarına qayıtmaq imkanının yarandığı qeyd edilib.

Azərbaycan dövləti tərəfindən işğaldan azad edilmiş ərazilər ən abad guşələrdən birinə çevriləcək, əhalinin dayanıqlı məskunlaşması təmin ediləcək.

Sonda məcburi köçkünlər və Böyük Qayıdışla bağlı BMT-nin “İqtisadi, sosial və mədəni hüquqlar” üzrə komitənin ekspertlərinin sualları cavablandırılıb.