Mayın 4-də Azərbaycan Respublikası Qaçqınların və Məcburi Köçkünlərin İşləri üzrə Dövlət Komitəsinin sədri Rövşən Rzayev AMEA İqtisadiyyat İnstitutunun direktoru Nazim Müzəffərli (İmanov) ilə görüşüb.
Görüşdə Azərbaycan Respublikasının Prezidenti, Müzəffər Ali Baş Komandan İlham Əliyevin rəhbərliyi ilə rəşadətli ordumuzun torpaqlarımızı işğaldan azad etməsindən sonra Qarabağın dirçəlişi, məcburi köçkünlərin öz doğma yurdlarına qayıtması üçün zəruri tədbirlərin həyata keçirilməsinə başlanıldığı qeyd edilib. İşğaldan azad edilmiş ərazilərdə aparılacaq bərpa və yenidənqurma işləri barədə fikir mübadiləsi aparılıb, Dövlət Komitəsi ilə elmi qurumlar arasında bu sahədə mümkün və faydalı ola biləcək əməkdaşlıq istiqamətləri müzakirə olunub.
Vurğulanıb ki, bərpa-quruculuq işlərinin uğurla həyata keçirilməsi, böyük qayıdışın effektivliyinin təmin edilməsi üçün dövlət orqanlarının, siyasi və ictimai təşkilatların, elmi ictimaiyyətin və ümumən, bütün vətəndaşlarımızın birlikdə yorulmadan çalışması vacib şərtdir. Dövlət Komitəsinin sədri və İnstitutun direktoru bu məsələlərin həlli istiqamətində davamlı əməkdaşlığa hazır olduqlarını ifadə ediblər.
